რა არის წყალი?
წყალი წყაროა სიცოცხლის. იგი თითოეული ჩვენგანის ნაწილია. ჩვენს ორგანიზმში იმდენი წყალი გროვდება, რამდენიც ჩვენს არსებობას ესაჭიროება, არც მეტი, არც ნაკლები, მხოლოდ იმდენი, რამდენიც სიცოცხლეს სჭირდება რომ დინება არ შეწყვიტოს. წყალი ჩვენს გვერდით იყო ყოველთვის ჩვენს ისტორიაში, ჩვენს კულტურაში, ჩვენს რწმენებში. ის იყო და იქნება ბუნების მარადიული შთამაგონებელი და ჩვენი ცხოვრების აუცილებელი კომპონენტი. აი რატომაც უნდა გავუფრთხილდეთ მას.
მტკნარი წყალი
დედამიწის წყლის მხოლოდ ძალიან მცირე ნაწილია ხელმისაწვდომი მტკნარი წყალი, რომელიც ასე გვჭირდება ადამიანებს. ის წყლები, რომლებსაც ყოველდღიურად ვიყენებთ, მხოლოდ წამიერად იჩენენ თავს ზედაპირზე — როგორც მყისიერი მოგზაურები, რომლებიც მალევე აგრძელებენ წრიულ გზას. დედამიწის წყლის დიდი ნაწილი კი ყინულებში, ოკეანეებში და მიწისქვეშა რეზერვუარებშია მოქცეული. ამ პირობებში, წყლის წრებრუნვა — ის ბუნებრივი ციკლი, რომელიც სიცოცხლეს აძლევს არსებობის საშუალებას — კიდევ უფრო მნიშვნელოვანი ხდება.
წყლის წრებრუნვა კომპლექსური და სრულყოფილი პროცესია
წყლის წრებრუნვა კომპლექსური და სრულყოფილი პროცესია. ის არ არის მხოლოდ ფიზიკური მოძრაობა, ეს არის ბუნების სიბრძნის გამოხატულება. მზე აორთქლებს ოკეანეებსა და მდინარეებს, ყინული სუბლიმირებს, ორთქლი ცაში ადის, იქ კონდენსირდება და ღრუბლებად იქცევა. შემდეგ, როგორც წვიმა, თოვლი ან სეტყვა ისე ბრუნდება უკან დედამიწაზე. ამ პროცესში იგი ერთი აგრეგატული მდგომარეობიდან მეორეში გადადის. ის გადაადგილდება ეკოსისტემებში და ისევ იწყებს გზას — დაუსრულებლად, წრიულად, დაბალანსებულად.
ეს ბუნებრივი წრებრუნვა გვასწავლის ერთ უმნიშვნელოვანეს გაკვეთილს: ყველაფერი რაც სუფთა, ეფექტიანი და მდგრადია — ციკლურია.
ბლოგი სწორედ ამას ეძღვნება — ბუნებრივი წრიული პროცესების დაკვირვებას და იმის გააზრებას, თუ როგორ შეუძლია ამ პროცეს შთააგონოს ადამიანი შექმნას საკუთარი სისტემები ისეთი, რომლებიც წრიულია, გამძლეა და ჰარმონიული.
წრიული ეკონომიკის კონცეფცია
წრიული ეკონომიკის კონცეფცია, რომელიც ბუნებიდან იღებს მაგალითს გულისხმობს რესურსების რაც შეიძლება ხანგრძლივად შენარჩუნებას სისტემაში, ნივთების ხელახალ გამოყენებას, შეკეთებას და გადაამუშავებას, იმის ნაცვლად, რომ გამოყენების შემდეგ პირდაპირ გადავყაროთ. ჩვენ შეგვიძლია ვიპოვოთ ეკონომიკური ზრდის ახალი გზა ისეთი, რომელიც არ ანადგურებს, არამედ ქმნის; არ იფლანგება, არამედ ინახავს; არ გამორიცხავს, არამედ აერთიანებს.
როგორ შეიძლება ადამიანის მიერ შექმნილმა სისტემებმა მიბაძონ წყლის წრებრუნვას?
ბუნებაში წვიმა ისევ მიწას უბრუნდება და მის ნაწილად იქცევა. ანალოგიურად, ურბანულ გარემოში ჩვენ შეგვიძლია სახურავებზე დავამონტაჟოთ წყლის შეგროვების სისტემები მორწყვისა და ტექნიკური მოხმარებისთვის, სარეცხი მანქანისთვის ან საპირფარეშოში გამოსაყენებლად, ასე ჩვენ თავდიან ავირიდებთ წყლის ფუჭ გაფლანგვას.
თუ ბუნება გვაჩვენებს როგორ მოძრაობს წყალი ისე რომ სიცოცხლე არ წყდება, მაშინ ჩვენ შეგვიძლია მისგან ვისწავლოთ. წრიული პროცესები ბუნებაში არ არის ალტერნატივა — ისინი ნორმაა. იქნებ დროა, ჩვენი სისტემებიც იმავე წესით ავაწყოთ?