CENN-ის პროექტი „კლიმატის ინოვაციური სერვისების შექმნა სამეცნიერო და ადგილობრივი ცოდნის ინტეგრირების გზით (I-CISK)” აქტიურად თანამშრომლობს იაკობ გოგებაშვილის სახელობის თელავის სახელმწიფო უნივერსიტეტთან.
თანამშრომლობა ორ მიმართულებას მოიცავს. ერთი მხრივ, უნივერსიტეტის წარმომადგენლები ალაზნის მულტი-აქტორული პლატფორმის წევრები არიან და აქტიურ მონაწილეობას იღებენ ალაზანი-იორის აუზისთვის მდინარის ჩამონადენის პროგნოზირების სისტემის შექმნაში. მეორე მხრივ, აგრარულ, საბუნებისმეტყველო მეცნიერებათა და ტექნოლოგიების ფაკულტეტის მაგისტრატურის სტუდენტმა ცისანა კოლოტაძემ, პროექტის ფარგლებში, ეკოლოგიის სამაგისტრო ნაშრომი შეიმუშავა თემაზე: „ალაზანი-იორის აუზის ჰიდროლოგიური მონიტორინგისა და სარწყავი სისტემის შეფასება კლიმატის ცვლილებით გამოწვეული პრობლემის მიტიგაციისათვის“.
კვლევა ეფუძნებოდა 2023-2024 წლებში ალაზნისა და იორის აუზებში შეგროვებულ მონაცემებს, რომელიც I-CISK პროექტის ფარგლებში ჩატარდა და მისი მიზანი არსებული სამელიორაციო სისტემების მდგომარეობის შესწავლა და შეფასება იყო. ნაშრომის ფარგლებში კიდევ ერთხელ გამოიკვეთა აუზში არსებული სარწყავი სისტემების სირთულეები და მდინარის ჩამონადენის პროგნოზირების სისტემის შექმნის საჭიროება.