ევროკავშირის მხარდაჭერით, CENN პარტნიორ ორგანიზაციებთან – ახალგაზრდა პედაგოგთა კავშირთან, დემოკრატიის ინსტიტუტთან და ქედის ადგილობრივ განვითარების ჯგუფთან (LAG) ერთად გურიის რეგიონის ადგილობრივი მოსახლეობისთვის სხვადასხვა მიმართულებით ცნობიერების ამაღლების სესიებს აგრძელებს.
“მწვანე გურია – ადგილობრივი დემოკრატიისა და სოფლის განვითარების მხარდაჭერა ინკლუზიური და მწვანე ზრდისთვის” პროექტის ფარგლებში, გურიის სამივე რეგიონში – ოზურგეთში, ჩოხატაურსა და ლანჩხუთში გრძელდება თემატური ტრენინგების ციკლი. მორიგი სამი სესია სურსათის უვნებლობის შესახებ გაიმართა, რომლებსაც ოზურგეთის, ჩოხატაურისა და ლანჩხუთის 100-მდე მოსახლე დაესწრო.
საქართველოში სურსათის უვნებლობის ექსპერტმა, მირანდა გორგილაძემ ოზურგეთის, ჩოხატაურისა და ლანჩხუთის ადგილობრივ მოსახლეობას გაუზიარა თეორიული ცოდნა და გამოცდილება სურსათის უვნებლობის ადგილობრივი კანონმდებლობისა და საერთაშორისო პრაქტიკის შესახებ. სესიები დაეთმო თემებს: კანონმდებლობა და სტანდარტები; კარგი აგრარული პრაქტიკა; კარგი საწარმოოო პრაქტიკა; კარგი ჰიგიენის პრაქტიკა; საფრთხის ანალიზი და კრიტიკული საკონტროლო წერტილები.
ტრენინგების მიზანია ადგილობრივი მოსახლეობის ცნობიერების ამაღლება ბუნებრივი რესურსების მდგრადი მართვის; ნარჩენების მართვის; მწვანე ზრდის შესაძლებლობებისა და სოფლის ეკონომიკური წყაროების დივერსიფიკაციის; კლიმატგონივრული ჭკვიანი და მდგრადი სასოფლო–სამეურნეო პრაქტიკის; სურსათის უვნებლობისა და წარმოების სტანდარტის; სანიტარიის, ჰიგიენისა და ჯანდაცვის საკითხების მიმართულებებით.
პროექტი “მწვანე გურია ადგილობრივი დემოკრატიისა და სოფლის განვითარების მხარდაჭერა ინკლუზიური და მდგრადი მწვანე ზრდისთვის” ხორციელდება ევროკავშირის ფინანსური მხარდაჭერით სოფლისა და სოფლის მეურნეობის განვითარების ევროპის სამეზობლო პროგრამის ENPARD IV ფარგლებში. პროექტს ახორციელებს CENN, ახალგაზრდა პედაგოგთა კავშირთან, დემოკრატიის ინსტიტუტთან და ქედის ადგილობრივ განვითარების ჯგუფთან (LAG).