GOPA Intec, ევროკავშირის მხარდაჭერილი პროექტის „საქართველოს ენერგეტიკული სექტორის რეფორმის პროგრამის (GESRP)“ ფარგლებში, თბილისის სკოლებისათვის აცხადებს შესარჩევ კონკურსს საერთაშორისო კამპანიაში მონაწილეობის მისაღებად.
4-თვიანი კამპანია დაეხმარება სკოლებს ენერგიის დაზოგვის ევროპული პრაქტიკის შემოღებასა და ენერგოეფექტურობის წახალისებაში. კამპანია ასევე ხელს შეუწყობს მოსწავლეებისა და მასწავლებლების ენერგოეფექტურობის საკითხებზე ცნობიერების ამაღლებასა და ქცევის ცვლილებას.
კონკურსის შედეგად შეირჩევა 10 სკოლა, რომელიც ჩაერთვება 4-თვიან კამპანიაში და მონაწილეობას მიიღებს შემდეგ აქტივობებში:
- ტრენინგები ენერგოეფექტურობასა და განახლებად ენერგიაზე მოსწავლეებისა და მასწავლებლებისათვის;
- სკოლების აუდიტი ენერგეტიკული და წყლის რესურსების გამოყენების გაუმჯობესებაზე (აუდიტი ხორციელდება ევროკავშირში დანერგილი მოხალისეობრივი ინსტრუმენტის – Energy Display-ის, გამოყენებით, რომლის მიზანია, რომ წაახალისონ ქვეყნები, გახადონ შენობები მეტად ენერგოეფექტური და გარემოსადმი მეგობრული);
- 4-თვიანი კამპანია სკოლებში ენერგეტიკული და წყლის რესურსების გამოყენებაზე (კამპანიის დაგეგმვასა და განხორციელებაში ჩაერთვებიან ადგილობრივი და საერთაშორისო ექსპერტები).
კამპანიის დასრულების შემდეგ:
- გაიცემა სერტიფიკატები შერჩეული 10 სკოლის მოსწავლეებისა და მასწავლებლებისათვის;
- საუკეთესო კამპანიის ავტორი 3 სკოლა დაჯილდოვდება პროექტ GESRP-ისგან ტექნიკური აღჭურვილობითა და სხვა თემატური საჩუქრებით.
*ნიკო კეცხოველის სასკოლო პრემიის მონაწილე სკოლებს შესაძლებლობა ექნებათ, კამპანიის ფარგლებში განხორციელებული აქტივობები გამოიყენონ ნერგების (ქულების) დასაგროვებლად.
კონკურსის პირობები და მონაწილეობის კრიტერიუმები
შესარჩევ კონკურსში მონაწილეობის მისაღებად, სკოლებმა უნდა გაიარონ რეგისტრაცია და წარმოადგინონ სამოტივაციო წერილი კამპანიაში მონაწილეობის მიღებად. მონაწილე 10 სკოლის შერჩევა მოხდება როგორც სამოტივაციო წერილით, ისე აღწერილი აქტივობების შესაბამისად.
შესარჩევ კონკურსში მონაწილეობის მისაღებად:
- სკოლა უნდა იყოს დარეგისტრირებული თბილისში (მონაწილეობა შეუძლიათ როგორც საჯარო, ისე კერძო სკოლებს);
- სკოლას უნდა ჰყავდეს სხვადასხვა კლასის მოსწავლეებისგან დაკომპლექტებული მოხალისეთა, მინიმუმ, 10-წევრიანი გუნდი;
- სკოლის მოხალისეთა გუნდს უნდა ჰყავდეს, მინიმუმ, ერთი პასუხისმგებელი მასწავლებელი.
შესარჩევი კონკურსის ვადები: 6 – 16 მარტი, 2023
კამპანიის განხორციელების ვადები: მარტი – ივნისი, 2023
შესარჩევ კონკურსში მონაწილეობის რეგისტრაციის ბმული: https://forms.gle/dmh4zNukFM5qgcd66