CENN-მა, გაეროს განვითარების პროგრამისა და ნორვეგიის მხარდაჭერით და გარემოს დაცვისა და სოფლის მეურნეობის სამინისტროსთან თანამშრომლობით, წამოიწყო პროექტი „შევამციროთ პლასტმასით გარემოს დაბინძურება“.
აღნიშნული ერთწლიანი ინიციატივა მიზნად ისახავს პლასტმასის ნარჩენების მართვის ცირკულარული მოდელების შესახებ დაინტერესებული მხარეების შესაძლებლობების გაზრდასა და საზოგადოების ცნობიერების ამაღლებას. პროექტის გახსნითი ღონისძიება 9 თებერვალს გაიმართა სასტუმრო რედისონ ბლუ ივერიაში. პროექტის გახსნით ღონისძიებაზე მისასალმებელი სიტყვით გამოვიდნენ და საქართველოში პროექტის განხორციელებასთან დაკავშირებით საკუთარ მიზნებსა და გეგმებზე ისაუბრეს დაგლას უებმა, გაეროს განვითარების პროგრამის მოქმედმა მუდმივმა წარმომადგენელმა საქართველოში, რებეკა ლიმ, ნორვეგიის ელჩის მოადგილემ საქართველოში, ალვერდ ჩანქსელიანმა, ნარჩენებისა და ქიმიური ნივთიერებების მართვის დეპარტამენტის პირველადი სტრუქტურული ერთეულის ხელმძღვანელმა (საქართველოს გარემოს დაცვისა და სოფლის მეურნეობის სამინისტრო) და ლოღან ნიკოლიმ, CENN-ის აღმასრულებელმა დირექტორმა.
მისასალმებელი ნაწილის შემდეგ, ღონისძიებამ თემატურ პანელურ დისკუსიას უმასპინძლა, სადაც როგორც მთავრობის, ისე კერძო და არასამთავრობო სექტორის წარმომადგენლებმა ქვეყანაში ცირკულარული ეკონომიკის კონკრეტული გადაწყვეტების შესაძლებლობებზე ისაუბრეს. დარგის ექსპერტებმა ყურადღება პლასტმასის ნარჩენების მართვისა და ცირკულარული ეკონომიკის გამოწვევებზე, თანამედროვე მიდგომებზე და საქართველოში დანერგილ წარმატებულ მაგალითებზე გაამახვილეს. ღონისძიების ბოლოს კი პროექტში დაგეგმილი, პლასტმასის ნარჩენების შემცირების კამპანია დაანონსდა, რომელიც ამ მიმართულებით ბიზნესსექტორის გააქტიურებას ისახავს მიზნად.
პროექტის „შევამციროთ პლასტმასით დაბინძურება საქართველოში“ დაწყებით, ქვეყანა მნიშვნელოვან ნაბიჯს დგამს როგორც ცირკულარული ეკონომიკის პრინციპების დანერგვისა და პოპულარიზაციის, ისე – ევროინტეგრაციის გზაზე.
