ევროკავშირის მხარდაჭერილი პროექტის „ცირკულარული ქალაქები და რეგიონები საქართველოში“ ფარგლებში, CENN-მა, ქობულეთის პროფესიულ კოლეჯ „ახალ ტალღასთან“ და სასტუმრო ბათუმი ჰილტონთან პარტნიორობით, საკვების ნარჩენების შემცირებაზე კულინარიული მასტერკლასი ჩაატარა. ღონისძიება ევროკავშირის მწვანე დიპლომატიური კვირეულის ფარგლებში, 2025 წლის 29 სექტემბერს გაიმართა, საკვების დანაკარგისა და ნარჩენების შესახებ ცნობიერების ამაღლების საერთაშორისო დღეს.
მასტერკლასი, რომელსაც სასტუმრო ბათუმი ჰილტონის აღმასრულებელი შეფი უძღვებოდა, კოლეჯ „ახალი ტალღის“ კულინარიული პროგრამის სტუდენტებს სთავაზობდა პრაქტიკულ და კრეატიულ გზებს, როგორ შეამცირონ საკვების დანაკარგები კულინარიაში. მონაწილეებმა ისწავლეს, რატომ არის საკვების ნარჩენების შემცირება მნიშვნელოვანი როგორც გლობალურ, ისე ადგილობრივ დონეზე და როგორ შეუძლიათ ამ ცოდნის ყოველდღიურ პრაქტიკაში გამოყენება. მათ ნახეს, თუ როგორ უნდა აქციონ მოძველებული პური ორცხობილად, მწვანილის ღეროები და ფოთლები – პესტოდ, ხოლო ხილისა და ბოსტნეულის ნარჩენები – გემრიელ კერძებად.
პრაქტიკული სესიის შემდეგ, CENN-მა ერთსაათიანი დისკუსია გამართა კლიმატის ცვლილებისა და საკვების ნარჩენების შესახებ, სადაც ხაზი გაუსვა საკვების დანაკარგისა და ნარჩენების შემცირების მნიშვნელობას კლიმატის კრიზისთან ბრძოლაში.
ღონისძიებაში მონაწილეობდა 30-ზე მეტი კულინარიის მიმართულების სტუდენტი. მასტერკლასის შედეგად, მათ უდანაკარგო რეცეპტების მომზადების როგორც თეორიული, ასევე პრაქტიკული გამოცდილება მიიღეს. ინიციატივამ წვლილი შეიტანა მდგრადი მოხმარების, ცირკულარული პრაქტიკისა და საკვების ნარჩენების შემცირების მნიშვნელობაზე ცოდნის გაზრდას, განსაკუთრებით ადგილობრივ თემებში – თითოეული ადამიანის ქმედება მნიშვნელოვანია გლობალური მდგრადი განვითარების მიზნების მისაღწევად.
პროექტის შესახებ
ევროკავშირის მხარდაჭერით მიმდინარე ოთხწლიანი პროექტი „ცირკულარული ქალაქები და რეგიონები საქართველოში: ადგილობრივი უნარ-შესაძლებლობების გაუმჯობესება საქართველოს რეგიონებში ნარჩენების პრევენციისა და ცირკულარული ეკონომიკის განვითარების ხელშეწყობისთვის“ ხორციელდება CENN-ის მიერ, ICLEI Europe-თან თანამშრომლობით. პროექტის მიზანია საქართველოში უფრო ინკლუზიური, მდგრადი და გარემოსადმი მედეგი მომავლის შექმნა, კახეთის რეგიონსა და აჭარის ავტონომიურ რესპუბლიკაში რესურსეფექტიანობის, მდგრადი მოხმარებისა და წარმოების პრაქტიკის ხელშეწყობისა და ნარჩენების წარმოქმნის მნიშვნელოვნად შემცირების გზით.