CENN-მა, ევროკავშირის მხარდაჭერითა და ორგანიზაციებთან Green Lane NGO (სომხეთი) და KRDF (საქართველო) პარტნიორობით, პროექტის „EU4Youth – სოციალური მეწარმეობის ეკოსისტემის განვითარება (SEED) მწვანე ზრდისთვის“ დახურვით კონფერენციასა და მეწარმეების გამოფენას უმასპინძლა.
ღონისძიება მისასალმებელი სიტყვით გახსნა კოლომბ დე მერსიმ, საქართველოში ევროკავშირის წარმომადგენლობის მმართველობისა და ადამიანური კაპიტალის მიმართულების ხელმძღვანელმა.
„ძალიან გახარებული ვარ, რომ დღეს ვარ თქვენთან ერთად და ვხედავ იმ შედეგებს, რომლებსაც ამ პროექტმა მიუხედავად ბევრი გამოწვევისა რეგიონში, წარმატებით მიაღწია. ერთი მხრივ, ძალიან სევდიანი დღეა, რადგან ეს მნიშვნელოვანი პროექტი დასასრულს უახლოვდება. თუმცა, მეორე მხრივ, ვფიქრობ, რომ ეს მხოლოდ დასაწყისია იმ ცვლილებებისა, რომლებსაც ამ პროექტის ფარგლებში ჩაეყარა საფუძველი. მნიშვნელოვანია, რომ თქვენ, ახალგაზრდებმა გააგრძელოთ თქვენს ქვეყნებში, თემებში და ოჯახებში მუშაობა უფრო მწვანე, უფრო მდგრადი და დემოკრატიული მომავლისთვის“, თქვა კოლომბ დე მერსიმ.
ევროკავშირის დელეგაციის შემდეგ მისასალმებელი სიტყვებით CENN-ის აღმასრულებელი დირექტორი ნანა ჯანაშია, სომხური არასამთავრობო ორგანიზაციის Green Lane-ის პრეზიდენტი ნუნე სარუხანიანი და KRDF-ის აღმასრულებელი დირექტორი თამარ ბექაური გამოვიდნენ.
„CENN დაარსების პირველივე დღიდან ზრუნავს ახალგაზრდების გაძლიერებაზე. ჩვენ გვჯერა, რომ აქტიური ახალგაზრდობა არის დემოკრატიის მთავარი საყრდენი. ამიტომ, ჩვენი პროექტები ეხმიანება ახალგაზრდების მხარდაჭერის მექანიზმებს, ახალგაზრდების ინტეგრაციას და მონაწილეობას მწვანე და დემოკრატიული ღირებულებების ჩამოყალიბებაში. SEED პროექტი აქტიურად მუშაობდა მოწყვლად ახალგაზრდებთან საქართველოში გორის, ახმეტისა და ნინოწმინდის მუნიციპალიტეტებსა, და სომხეთში ლორის, ტავუშისა და შირაკის რეგიონებში,“ თქვა ნანა ჯანაშიამ.
კონფერენცია დასრულდება გამოფენით, რომელშიც პროექტის 18-მა გრანტიორმა სოციალურმა და მწვანე მეწარმემ მიიღო მონაწილეობა სომხეთიდან და საქართველოდან. სტუმრებს ჰქონდათ უნიკალური შესაძლებლობა, საგამოფენო სივრცეში გაეცნოთ ბენეფიციარი მეწარმეები, მათი პროდუქტები და სერვისები.
კონფერენციას ესწრებოდნენ დაინტერესებული მხარეების პლატფორმის წევრები საქართველოდან და სომხეთიდან, ახალგაზრდული ორგანიზაციები, ლიდერები და სხვა დაინტერესებული პირები. სტუმრებმა მოისმინეს ბოლო სამი წლის განმავლობაში საქართველოსა და სომხეთში მიღწეული პროექტის შედეგების შესახებ; პროექტის მენეჯერის, მარიამ ხერგიანის მიერ ჩატარებული მოკლე პრეზენტაცია მოიცავდა მიღწევებსა და გამოწვევებს მწვანე განათლების, სოციალური მეწარმეობის საკანონმდებლო ბაზის, მეწარმეობისა და ახალგაზრდებთან მუშაობის მიმართულებებით. სტუმრები ასევე გაეცნენ რეგიონებში შექმნილ სერვისებსა და პროდუქტებს, რომლებსაც სთავაზობენ პროექტის ბენეფიციარი სოციალური და მწვანე საწარმოები ორივე ქვეყანაში და მოიცავენ ისეთ სფეროებს, როგორებიცაა ნარჩენების მდგრადი მართვა, ეკოტურიზმი, სოფლის მეურნეობა, ეკოწარმოება, ჯანდაცვა და ა.შ.
პროექტის ფარგლებში დაფინანსებული საწარმოების შესახებ მეტი ინფორმაციისათვის, ეწვიეთ პროექტის შემაჯამებელი კატალოგის ბმულს: https://cutt.ly/v42Ja9j
მეტი ინფორმაციისთვის, მიმართეთ:
ანა პეტრიაშვილი, კომუნიკაციის მენეჯერი, CENN
E-mail: ana.petriashvili@cenn.org
პროექტის შესახებ
ევროკავშირის მიერ დაფინანსებული „EU4Youth: საზღვრისპირა რეგიონებში სოციალური მეწარმეობის ეკოსისტემის განვითარება (SEED) მწვანე ზრდისთვის“ პროექტის მიზანი საქართველოსა და სომხეთში სოციალური და მწვანე მეწარმეობის განვითარებისათვის ხელსაყრელი გარემოს შექმნა იყო.
პროექტის ამოცანას სამხრეთ კავკასიის საზღვრისპირა, მოწყვლად მუნიციპალიტეტებში ახალგაზრდებში სამეწარმეო პოტენციალის აღმოჩენა და ახალგაზრდების შესაძლებლობების განვითარების ხელშეწყობა წარმოადგენდა. SEED ითვალისწინებდა მწვანე სამეწარმეო იდეების აღმოჩენას, მათი განვითარების ხელშეწყობასა და პრაქტიკული განხორციელების მხარდაჭერას. პროექტის ძირითად კომპონენტებს მოწყვლადი ჯგუფების გაძლიერება, ახალგაზრდების დასაქმების გაზრდა და მწვანე მეწარმეობით გარემოსთან დაკავშირებული გამოწვევების გამკლავება წარმოადგენდა.
პროექტი 2019 – 2023 წლებში ხორციელდებოდა CENN-ის, Green Lane NGO-სა და KRDF-ის მიერ და ფარავდა საქართველოში გორის, ნინოწმინდისა და ახმეტის მუნიციპალიტეტებს, ხოლო სომხეთში – შირაქის, ლორისა და ტავუშის რეგიონებს.