მოხარულები ვართ, შევაჯამოთ პროექტი “შევამციროთ პლასტმასით დაბინძურება საქართველოში”, რომელიც CENN-მა გაეროს განვითარების პროგრამისა (UNDP) და ნორვეგიის მხარდაჭერით განახორციელა.
ერთწლიანი ინიციატივა მიზნად ისახავდა პლასტმასის ნარჩენების შემცირებასა და ცირკულარული მოდელების შესახებ ცნობიერების ამაღლებას, რაც დაინტერესებული მხარეების შესაძლებლობების გაზრდას, საზოგადოების ცნობიერების ამაღლებასა და საქართველოში მდგრადი პრაქტიკების დანერგვის ხელშეწყობას ითვალისწინებდა.
პროექტი მოიცავდა მრავალფეროვან აქტივობებს, რომლებიც მიმართული იყო ნარჩენების მართვის შესახებ პრაქტიკული ცოდნისა და ეფექტური მეთოდების გაზიარებაზე. საერთაშორისო ექსპერტების ჩართულობით ჩატარდა არაერთი საინფორმაციო შეხვედრა, რომლებშიც მონაწილეობდნენ როგორც ბიზნესები, ისე საზოგადოებრივი ორგანიზაციები, მათ შორის HORECA (სასტუმროები, რესტორნები, კაფეები) სექტორის წარმომადგენლები, მწარმოებლები და სხვა დაინტერესებული მხარეები. აღნიშნული აქტივობების ძირითადი მიზანი იყო უკვე არსებული მდგრადობის პრაქტიკებისა და გამოცდილების გაზიარება სხვადასხვა ორგანიზაციაში ცირკულარული ეკონომიკის პრაქტიკების დანერგვის ხელშეწყობისთვის.
პროექტის ერთ-ერთი მნიშვნელოვან კომპონენტს წარმოადგენდა ბიზნესკამპანია, რომლის ფარგლებშიც ათი ბიზნესი გაერთიანდა და თითოეულმა მათგანმა ინდივიდუალური მენტორინგის საფუძველზე მნიშვნელოვანი ცვლილებები განახორციელა პლასტმასის ნარჩენების შემცირების კუთხით.
გარდა ამისა, პროექტის ფარგლებში საგანმანათლებლო მიმართულებით განხორციელდა არაერთი აქტივობა ახალგაზრდების ჩართულობით. სკოლებთან ჩატარდა კონკურსები, ტრენინგები, ვიქტორინები, თემატური ღონისძიებები, რომლებიც ნარჩენების შემცირებასა და მდგრადი მოხმარების წახალისებაზე იყო ორიენტირებული. ამავე მიზნით, ბულაჩაურის მწვანე ცენტრმა 50 სკოლის მოსწავლეს უმასპინძლა საქართველოს რეგიონებიდან, სადაც დარგის სპეციალისტების მიერ გარემოსდაცვით საკითხებზე თემატური ტრენინგები ტარდებოდა. ახალგაზრდებმა შთამბეჭდავ შედეგებს მიაღწიეს და აღნიშნული აქტივობების საფუძველზე დასაბამი მიეცა ინოვაციური ინიციატივების განხორციელებას.
პროექტის დასასრულს გაიმართა მრავალსექტორული შეხვედრა, სადაც ღირებულებათა ჯაჭვში ჩართულმა მოწინავე აქტორებმა ისაუბრებს საკუთარ საქმიანობაზე, შეაფასეს სექტორში ცირკულარობის დონე. ღონისძიების მონაწილეებმა განიხილეს სხვადასხვა სექტორში პლასტმასის მოხმარებასთან დაკავშირებული გამოწვევები და მათი გადაწყვეტის შესაძლო გზები, რამაც ხელი შეუწყო კომპანიებს შორის სამომავლო თანამშრომლობის ჩამოყალიბებას.
მრავალსექტორული შეხვედრა დაეხმარა მონაწილეებს პროექტის შედეგების შეჯამებასა და მომავალი ინიციატივების დასაგეგმად საჭირო ხედვების განვითარებაში.
პროექტი “შევამციროთ პლასტმასით დაბინძურება” განხორციელდა CENN-ის მიერ, გაეროს განვითარების პროგრამისა (UNDP) და ნორვეგიის მხარდაჭერით. ის წარმოადგენდა UNDP-ისა და ნორვეგიის უფრო ფართომასშტაბიანი პროგრამის „ლიდერობა, თანასწორობა, ადვოკატირება, დემოკრატია“ (LEAD) ნაწილს.
