2024 წლის 3-8 აპრილს, CENN-მა და გარემოს ეროვნულმა სააგენტომ დელფტის წყლის განათლების ინსტიტუტის (IHE Delft) წარმომადგენლებს უმასპინძლეს.
ვიზიტის მიზანს წარმოადგენდა ალაზანი-იორის აუზში გვალვისა და მდინარის ჩამონადენის სეზონური პროგნოზირების სისტემის დანერგვის პროცესის შეფასება და სამომავლო ნაბიჯების დაგეგმვა. ვიზიტის ფარგლებში, პროექტს გუნდმა ინტენსიური შეხვედრები გამართა საქართველოს მელიორაციასთან, სოფლის განვითარების სააგენტოსთან, UNDP-ის „კლიმატით გამოწვეული კატასტროფების რისკების შემცირება საქართველოში“, პროგრამის წარმომადგენლებთან და ალაზნის მულტიაქტორული პლატფორმის (MAP) წევრებთან, სადაც განხილული იყო მათი გამოწვევები და საჭიროებები გვალვასთან და წყლის დეფიციტთან დაკავშირებით.
დაინტერესებულ მხარეებთან შეხვედრების გარდა, IHE Delft-ის წარმომადგენლებმა ილიას სახელმწიფო უნივერსიტეტში ჩაატარეს სემინარი “გვალვის მართვა კლიმატის ცვლილების პირობებში”, რომელსაც სხვადასხვა უნივერსიტეტის სტუდენტები დაესწრნენ.
ვიზიტის ფარგლებში შემუშავდა სამოქმედო გეგმა, რომლის მიხედვითაც CENN, გარემოს ეროვნულ სააგენტოსთან ერთად, დაინტერესებული მხარეების ჩართულობით, გააგრძელებს გვალვაზე და მდინარის ჩამონადენის სეზონური პროგნოზირების სისტემის დანერგვაზე მუშაობას. პროცესში ასევე ჩართული იქნებიან ექსპერტები პროექტის კონსორციუმის წევრი ორგანიზაციებიდან.
ვიზიტი განხორციელდა ევროკავშირის კვლევისა და ინოვაციების პროგრამის (Horizon 2020) მიერ მხარდაჭერილი პროექტის – კლიმატის ინოვაციური სერვისების შექმნა სამეცნიერო და ადგილობრივი ცოდნის ინტეგრირების გზით (I-CISK) – ფარგლებში, რომელსაც დელფტის წყლის განათლების ინსტიტუტი (IHE Delft) ახორციელებს 13 ორგანიზაციისგან შემდგარ კონსორციუმთან ერთად.
I-CISK პროექტის მთავარი მიზანია თანამონაწილეობითი მიდგომით შეიქმნას კლიმატის ისეთი სერვისები, რომლის საჭიროებაც აქვთ მოქალაქეებს, გადაწყვეტილების მიმღებ პირებსა და სხვადასხვა დაინტერსებულ მხარეს, მათთვის შესაბამისი სივრცითი და დროითი მასშტაბით.
2021 წლიდან საქართველოში პროექტის განმახორციელებელი ორგანიზაცია არის CENN. მთავარი პარტნიორი ორგანო კი გარემოს ეროვნული სააგენტოა.
