ევროკავშირის მხარდაჭერითა და პროექტ „მწვანე გურიის“ ფარგლებში, რეგიონში არაერთი ბიზნეს ინიციატივა დაფინანსდა, რომლებმაც ადგილობრივ ბაზარზე სრულიად ახალი, თანამედროვე სტანდარტები შემოიტანეს. ეს პროექტები ადასტურებს, რომ გურიაში ინოვაციური იდეების განხორციელების დიდი პოტენციალი არსებობს, სადაც ტექნოლოგიური პროგრესი და ადგილობრივი საჭიროებები ერთმანეთს ჰარმონიულად ერწყმება.
რეგიონის ეკონომიკური განვითარების ერთ-ერთი თვალსაჩინო მაგალითია სოფელ შუხუთში ლაშა ხუხუნაიშვილისა და გიორგი ჩხაიძის ინიციატივა, რომლის ფარგლებშიც 40 ლიტრიანი აგრო დრონი შეიძინეს. თანამედროვე ტექნოლოგიების გამოყენება ადგილობრივ ფერმერებს საშუალებას აძლევს, დაზოგონ რესურსები, დროულად აღმოაჩინონ მცენარეთა დაავადებები და მინიმალური დანახარჯებით მიიღონ მაქსიმალური მოსავალი. ეს არის მნიშვნელოვანი ნაბიჯი გურიაში „ჭკვიანი მეურნეობის“ დამკვიდრებისკენ, რაც სოფლის მეურნეობას უფრო ეფექტურსა და კონკურენტუნარიანს ხდის.
ინოვაციური მიდგომები კვების ინდუსტრიასაც შეეხო – აკაკი დოლიძის პროექტმა ოზურგეთში პირველი ევროპული ტიპის მობილური კვების ობიექტი „ბარბოსა“ შემოიყვანა. ობიექტი სრულად არის აღჭურვილი მზის ენერგიაზე მომუშავე სისტემით, რაც მას ეკოლოგიურად სუფთა ბიზნესად აქცევს. ეს ინიციატივა მდგრადი განვითარების საუკეთესო მაგალითია, რადგან იგი ერთდროულად სთავაზობს მომხმარებელს მაღალი ხარისხის სერვისს და ამცირებს გარემოზე ზემოქმედებას, რაც თანამედროვე ბიზნესის ერთ-ერთი უმთავრესი მოთხოვნაა.
მომსახურების სფეროს გაუმჯობესება გრძელდება ლანჩხუთში, სადაც ლაშა გვარჯალაძის ძალისხმევით თანამედროვე თვითმომსახურების ავტოსამრეცხაო და აქსესუარების სივრცე შეიქმნა. ერთ ობიექტზე თავმოყრილი მანქანის მოვლის სრული სერვისი მომხმარებელს საშუალებას აძლევს, კომფორტულ გარემოში დაზოგოს დრო და ენერგია. ობიექტის აღჭურვა უახლესი ტექნიკით პირდაპირ აისახება მომსახურების სისწრაფესა და ხარისხზე, რაც ადგილობრივ ბაზარზე მომსახურების სრულიად ახალ კულტურას ამკვიდრებს.
განსაკუთრებული ყურადღება დაეთმო სოციალური და გასართობი გარემოს განვითარებასაც. ეკატერინე ცერცვაძის გასართობი სერვისი „ჯადოსნური სამყარო“ ლანჩხუთში ბავშვებისათვის დღესასწაულების ორგანიზების ახალ სტანდარტს აწესებს. პროექტის ფარგლებში შეძენილი ინვენტარი და აპარატურა საშუალებას იძლევა, ნებისმიერი ლოკაცია მაღალი დონის გასართობ სივრცედ იქცეს, რაც ადგილობრივი ოჯახებისთვის ხარისხიან დასვენებასა და გართობაზე ხელმისაწვდომობას მნიშვნელოვნად ზრდის.
ევროკავშირისა და CENN-ის მიერ მხარდაჭერილი ეს ინიციატივები ადასტურებს, რომ გურია მზად არის დანერგოს ინოვაციები ბიზნესის სხვადასხვა სექტორში. მსგავსი ხელშეწყობა ქმნის მდგრად საფუძველს ახალი სამუშაო ადგილების გაჩენის, ადგილობრივი მეწარმეების გაძლიერებისა და რეგიონის საერთო ეკონომიკური კეთილდღეობისთვის.
სტატია მომზადებულია ევროკავშირის მხარდაჭერით. მის შინაარსზე სრულად პასუხისმგებელია CENN და შესაძლოა, რომ იგი არ გამოხატავდეს ევროკავშირის შეხედულებებს.