Nodo’s Winery – მეღვინეობა ოზურგეთში, რომელსაც საფუძველი 2017 წლიდან ჩაეყარა. საოჯახო მარანი წინაპრების დატოვებული ტრადიციის გაგრძელების მიზნით შეიქმნა, ყურძნის ადგილობრივი, გურული ჯიშები კი წარმოების ბირთვად იქცა. წარმოება 4 ქვევრითა და 250 ბოთლის ჩამოსხმით დაიწყო და მარანში ძირითადად, ალადასტური, ცოლიკაური და ჩხავერი ისხმებოდა. 2 წლის წინ კი ევროკავშირისა და CENN-ის მხარდაჭერით, მეღვინეობამ როგორც წარმოების ხარისხი, ისე მასშტაბები მნიშვნელოვნად გაზარდა.
ევროკავშირის მხარდაჭერით მიმდინარე პროექტ “მწვანე გურიის“ ფარგლებში განხორციელდა ღვინის წარმოების მნიშვნელოვანი გაფართოება, რისთვისაც შეძენილ იქნა თანამედროვე დანადგარები, მათ შორის, ღვინის შესანახი ავზები, ჩილერი და მუხის კასრები. ამ აღჭურვილობის დახმარებით შესაძლებელი გახდა როგორც ტრადიციული ქვევრის, ისე ევროპული სტილის ღვინოების წარმოება. გარდა ამისა, მოეწყო ღვინის მცირე ლაბორატორია, რომელიც უზრუნველყოფს ღვინის ხარისხის მუდმივ კონტროლს.
„ჩვენი მთავარი ნიშა ხარისხზე ორიენტირებაა. გურია პატარა რეგიონია, სადაც მეღვინეობა წლების განმავლობაში მივიწყებული იყო და ბევრისთვის მხოლოდ ‘ადესასთან’ ასოცირდებოდა. თუმცა, მას შემდეგ, რაც ავთენტური გურული ჯიშების აღდგენა დაიწყო, დარგმა ახალი სიცოცხლე შეიძინა და მეღვინეებიც ნელ-ნელა მოვმრავლდით. ჩვენც აქცენტს არა რაოდენობაზე, არამედ ადგილობრივი, იშვიათი ჯიშების წარმოებასა და მათ პოპულარიზაციაზე ვაკეთებთ“, – აღნიშნავს, თათია გოგიბერიძე, საოჯახო მარნის მფლობელი.
პროექტის მხარდაჭერამ მარანს ღვინის ხარისხის გაუმჯობესების შესაძლებლობა მისცა, რაც, პირველ რიგში, კონტროლის თანამედროვე მექანიზმების დანერგვაში გამოიხატა. „მწვანე გურიის“ ფარგლებში მიღებული გრანტით, მეღვინეობამ შეიძინა უახლესი ტექნოლოგიური ცისტერნები და მოაწყო მცირე ლაბორატორია, რამაც წარმოების პროცესი უფრო მაღალ სტანდარტზე აიყვანა. Nodo’s Winery-სთვის განსაკუთრებულ გამოწვევას ევროპული სტილის ღვინის დაყენება წარმოადგენდა; ეს მეთოდი მკაცრ ტექნოლოგიურ დისციპლინასა და ტემპერატურული რეჟიმის უზუსტეს დაცვას მოითხოვს, რაც ტრადიციული ინვენტარის პირობებში პრაქტიკულად მიუღწეველი იყო.
„ჩვენთვის ოცნებად იყო ისეთი ცისტერნების შეძენა, რომელსაც აქვს გამაცივებელი პერანგი, მოყვება აპარატი და ამ ცისტერნას აქვს პოტენცია იმის, რომ მარტივად დაიჭირო საჭირო ტემპერატურა. დიდი ფინანსების საჭიროების გამო, შორეულ პერსპექტივად გვესახებოდა მსგავსი ცისტერნების შეძენა, თუმცა პროექტმა მოგვცა ამის საშუალება. ეს კი იმას ნიშნავს, რომ მოგვეცა საშუალება ხარისხიანი ღვინის წარმოების“, – ამბობს თათია.
განვითარების ამ გზაზე მარანი არ აკლდება არც ერთ ღვინის კონკურსს. უკვე 2-3 წელია ისინი Wine Expo-ზე იღებენ მონაწილეობას, სადაც 2 წლის განმავლობაში სტაბილურად ინარჩუნებენ ვერცხლის მედლებს. განსაკუთრებული წარმატება კი მსოფლიოს ტოპ-5 კონკურსში შემავალ IWSC-ზე მოიპოვეს, სადაც მათმა ჩხავერმა ოქროს მედალი დაიმსახურა და საერთაშორისო პორტალზეც განთავსდა.
ეს აღიარება დიდ წილად გრანტის პირველ ეტაპზე შეძენილი ლაბორატორიის დამსახურებაა. ლაბორატორია მეღვინისთვის სასიცოცხლოდ მნიშვნელოვანია, რათა დაყენების პროცესში სწორად შეფასდეს ღვინო და სხვადასხვა კომპონენტების შემადგენლობა დადგენილ სტანდარტებს შეესაბამებოდეს. მის შეძენამდე მეღვინეებს აღმოსავლეთ საქართველოში ნიმუშების გაგზავნა ან თავად ჩასვლა უწევდათ, რაც მოუხერხებელი იყო. 2025 წლის დასაწყისიდან მოწყობილი ლაბორატორია უკვე რეგიონული მნიშვნელობისაა – მიუხედავად იმისა, რომ სერტიფიცირებას არ გასცემენ, გურიის სხვა მწარმოებლებიც ხშირად მიდიან Nodo’s Winery-ში ღვინის შესამოწმებლად.
დღეს მარანი მრავალფეროვან პროდუქციას სთავაზობს მომხმარებელს: ალადასტურს ორი სხვადასხვა ტიპის ღვინოდ აყენებენ, ჩხავერისგან კი რამდენიმე სახეობის ღვინო მზადდება. ცოლიკაური მათი ერთ-ერთი მთავარი ნიშაა. წელს სიახლეცაა -თანამედროვე ცისტერნების დამსახურებით, პირველად ჩამოასხამენ ცოლიკაურისა და ჩხავერის კუპაჟს, როზეს. სამომავლო გეგმები კიდევ უფრო ამბიციურია: 2026 წლის მარტში მტევანდიდის ჩამოსხმა იგეგმება, ასევე სიახლეა იშვიათი ჯიშის -საკმიელას წარმოებაც.
ევროკავშირისა და CENN-ის მხარდაჭერამ Nodo’s Winery-ს წარმოების გაორმაგების საშუალება მისცა – 2,500 ბოთლიდან 5,000 ბოთლამდე. გაზრდილია გაყიდვებიც, რეალიზება კი წარმატებით ხდება სხვადასხვა რესტორანსა და ღვინის ბარში გურიაში, ბათუმში, სენაკსა და თბილისში. ეს არის მაგალითი იმისა, თუ როგორ შეიძლება მცირე საოჯახო წამოწყება, სწორი მხარდაჭერით, მაღალტექნოლოგიურ და აღიარებულ ბრენდად იქცეს.
ეს სტატია შექმნილია ევროკავშირის მხარდაჭერით. მის შინაარსზე სრულად პასუხისმგებელია CENN და შესაძლოა, რომ იგი არ გამოხატავდეს ევროკავშირის შეხედულებებს.