მოხალისეთა ჯგუფის წევრმა 15-მა ახალგაზრდამ ეკოტურის ფარგლებში ქ. ტყიბულის მიმდებარე ტერიტორიებს ეწვია და ადგილზე არსებული გარემოსდაცვითი გამოწვევები შეისწავლა.
ახალგაზრდებმა მოინახულეს ქ. ტყიბულის შემოსასვლელიდან მოწყობილი ახალი გზა, რომელზეც გადაადგილდებიან მაღალი ტვირთამწეობის, ქვანახშირის გადამზიდი ავტომანქანები. აღნიშნული საავტომობილო გზა მდინარე „ტყიბულას“ გასწვრივ გადის, ყოფილი „საქნახშირის“ საქმიანი ეზოს ტერიტორიაზე, სადაც ამჟამად ქვანახშირის ნარჩენების სანაყაროა მოწყობილი. ასევე, ეკოტურის დროს ჯგუფის წევრები ეწვიენ ქვანახშირის საწარმოო ნარჩენების სანაყაროს, შეისწავლეს არსებული მდგომარეობა, გამოავლინეს გარემოსდაცვითი პრობლემები – მოსახლეობის მიერ მოწყობილი უკანონო ნაგავსაყრელები, საწარმოო ნარჩენების სანაყაროები, რომლებიც მოსახლეობასთან ძალიან ახლოსაა მოწყობილი და საფრთხეს უქმნის მათ ჯანმრთელობას. ასევე, ცენტრალური გამამდიდრებელი ფაბრიკის მიმდებარედ, საწარმოო ნარჩენებისაგან მდინარის დაბინძურების ფაქტები და სხვა.
ეკოტურის შედეგად, მოხალისეები პროექტის გუნდთან ერთად იმსჯელებენ და დასახავენ გამოვლენილი პრობლემების გადაჭრის გზებს და მოამზადებენ მიმართვას ტყიბულის მუნიციპალიტეტის მერიის სახელზე.
ახალგაზრდული ინიციატივები ევროკავშირისა და CENN-ის მიერ დაფინანსებული საგრანტო პროექტის „მზის ენერგიის გამოყენების ხელშეწყობა ტყიბულის მუნიციპალიტეტში” ფარგლებში ხორციელდება. საგრანტო კონკურსს იმერეთის რეგიონში იმერეთის მხარის მეცნიერთა კავშირი „სპექტრი” და „ტყიბულის რაიონის განვითარების ფონდი“ უნდგანან სათავეში.
საგრანტო კონკურსი CENN-ის მიმდინარე პროექტის “საქართველოს კლიმატის პროგრამა (GEO-CAP):სამოქალაქო საზოგადოების ჩართულობის ხელშეწყობა კლიმატის ცვლილების პოლიტიკის შექმნასა და განხორციელებაში ” მიერ გამოცხადდა, რომელსაც ის პარტნიორ ორგანიზაციებთან KRDF, ACU, YPU და RLS-ADA ერთად ახორციელებს.